 |
|
وطن وإنسان |
|
ناس بتاجر في لقمة الخبز، في قوت الإنسان. وناس تجارتها في البطيخ… في الفواكه في الخضار والباذنجان. وناس بتاجر في الأرض… وفي الأشجار… وناس تجارتها في الأمراض… وفي قطع الغيار… وناس بتاجر بالحجر… وفي الحجر… وناس بليالي السجن ناس بتاجر بيوم فيه لَمْ وجَمَعْ… دفع فيه قرش بالخاطر، بالغصب دفع… جاي اليوم… يطلب ثمن. ناس بالتاجر بدم شهيد… بإبن شهيد… نسيب شهيد… ناس بالتاجر بقلم كتب… مقال كتب… قلم انغمس في الحبر انغمس… في الدم انغمس… والثاني خطب… تاجر بخطاب… فقع… نفض… وانتفض…. ضل… وضلل… واللي صحيح خطب ولم الحطب، وأشعلها نار… وألهب… شعور الناس… في النهاية انسجن… واتغير عليه السجان. واحد تاجر بطفل مات… بصليه رشاش… مات برصاص مطاط مات… بذكريات :- أب … وجد … وأبو الجد… في يوم حارب…في يوم حارب العدوان… انتصر أو ما انتصر، أصبح من ذكريات زمان. هذا عائد… هذا وافد… هذا مقيم… هذا مواطن إيش عمل هذا… إيش سوى هذا… هذا بيطعن في هذا … ليش… ليش يا ناس. هذا بدو مكان… وهذا جاي يطالب له بمكان… ناس بتتناحر على المراكز… تتكالب على المراكز… بتتكالب على الوجاهة… على النفخة… كل شيء في ها البلد صار له ثمن… صار تجارة… تجارة كذب… تجارة أمجاد … ونسى الجميع أن الوطن لسه ما رجع… وما تحرر… الوطن بدو صراع… مرير … صراع مدمر… طريق طويل… طويل.. أجيال ورا أجيال ... نسى الناس أن الجهاد أنواع… والنضال أنواع… والكفاح أنواع وميادين الحرب أشكال وألوان… ناس يتحارب… بتضرب في العدو… وناس بتضرب في الأرض… علشان لقمة العيش علشان تقدم ذخيرة ورصاص… ورواتب… هذا عيب أن يمن هذا يمن على هذا… هذا ظهر لهذا… والثاني ظهر للأول… وكل واحد لأخوه سند… واحد بيطخ… واحد بيقدم له رصاص… واحد بيضمد الجراح… واحد بيصارع في البر… والثاني بيصارع في البحر…. وهناك أم ما ممكن ننكر عطاها… عطاها ما بيوزنة مال. يتقدم كل يوم شباب للوطن… بنين وبنات… بتحمل … بتولد… بتربي… بترضع لهيب… بتعطي للثورة حطب… وبتعطي للثورة حنان. وهذا عطا ما بيتقدر بثمن…. يا ناس…. يا ناس عيب ها الفرقة في الوطن…. يا ناس فلسطين طير… وإحنا له جنحان… ما فيش طير بيطير بجناح واحد… وما فيش طير بيعيش بدون جنحان… تساوى الكل… في محاربة العدوان… تساوى الكل… في الجراح.. في الغربة… في المذلة… في كبرياء الوطن.. في العطا يا ناس… مقيم… وغايب… بنين وبنات… عجايز… واختيارية… أطفال… ورجال… والوطن بدو عطا… وبدو رجال ... والحبل جرار ... الله يرحم اللي ماتوا… وجادوا بالنفس بأغلى ثمن… وما طلبوا ثمن. اللي بده للنضال ثمن، للكفاح ثمن، للجهاد ثمن، للسجن وأيامه ثمن… للحجر ثمن… مش من هالوطن….. مش من البشر … لأن الوطن مش تجارة… تجار الجملة والمفرق… تجار المعلبات الفاسدة… والأفكار الفاسدة… تجار التموين الفاسد.. الناس اللي بتعشش في الفساد… اللي بتتشعبط بدها كمان… ما لها أصل… ومش ممكن تبني وطن "وعمر النتاش بيته ما بيعلاش " – قالوها لنا من زمان . ناس غنيت… ناس فقرت… ناس مش لاقيه تاكل… ناس بترمي الأكل… اختلط الحابل بالنابل.. مواكب أفراح… صفارات إنذار… أعراس… باصات… تاكسيات… زوامير… زمامير… طبل ورقص في الشوارع ومفيش مانع… انعطل السير، والمسيرة، ونسكر الطرقات مواكب أفراح… مواكب أموات… مش مهم إندوس على إحساس الناس… ناس بتجري… وما بتدري… والوطن بدو رجال الوطن ما تحرر وعدونا ماكر وغدار… بيخطط… مؤسسات بتخطيط… بيدرس… مؤسسات وعقول بتدرس… بيفكر… علماء ومختصين للتفكير… ولبعيد قدام بيفكر… وبيعمل… كيف … طول عمره بيفكر، كيف يقتل في الفلسطيني… الإنسان… بالسم في الأكل … في الشرب… في الهوا… في كل مكان، همه قتل الأمل ويقتل في الفلسطيني الإنسان. عدو بيضرب الفكر…. في الرأس عقل… بيضرب في الرأس. عدو بيضرب في القلب… القلب مركز الحب… مركز الحنان. في القلب مخزون الوطن عدو بيضرب في عصب الظهر… في موطن الاستمرار في موطن الاستمرار… واحنا على الموت نرمي شبابنا… في غزة، في الخليل، في السهل، في الجبل … أطفالنا… وبناتنا… ورجالنا…بصدورهم بيهجموا على الدبابات… على المجنزرات… على الثكنات الأيد… فيها حجر…. وبيواجه الموت… والصدر عريان… وبيواجه الموت… والظهر عريان… وبيواجه الموت… وكل في حب الوطن يطلب الاستشهاد… يطلب الموت… علشان يحي الوطن… يعيش الوطن…. ومن بعيد… نسمع، نشيد… وإذاعات، ومارشات… والعدو بيحفر… بيجرف… وبيبني… مستوطنات وصحافة العرب… بتحفر عناوين ومانشتات… واسمع تصريحات… وصور… ومصورين… مراسلين ضجيج إعلام… والعدو بيبني مستوطنان…. والإذاعات، والميكروفونات…. هديرها مش مثل هدير الجرافات…. والنار بسرعة بتولع… وبسرعة بتنطفي … بشوية تصريحات… رجال السياسة بتناور… بتحاور… والعدو بيجرف… وبيبني مستوطنات…. والعم سام مع عدونا… العم سام هو عدونا… هو مستوطن في الأساس… هو صهيوني… يهودي هو سبب خربان الديار… العم سام مع عدونا… هو عدونا… عدو الوطن عدو الإنسان من الأساس.. عدونا من زمان… دباباته داستنا… مجنزراته فرمتنا… مزقتنا… بآلياته… برصاصه… ببطارياته… بصواريخه… بطياراته…. كل رصاصه… مكتوب عليها صنع في "يوأس ايه USA" كل شظية في القلب، في الرأس، في الظهر "ميد أن يوأس أيه Made In USA" كل طعنه خنجر في الصدر… في الظهر… وراها العم سام جند دولاراته … وساسته… وسياسته… والفيتو… وكل إمكانياته… وكمان… وكمان… واحنا معنا إذاعات… ميكروفونات… شوية مساعدات "وويل اللي يعادينا ويل"…. كل ضربنا في الهوا… وعلى الهوا… وضربهم فينا… في المليان… صارت قضيتنا… "نتن يا هو" و"باراك" ونفق وأبو غنيم ... (وسبتمبر)* ... وبن امبارح كانو وين عدونا "نتن يا هو"… اللي دمرنا "نتن ياهو"… صهيوني وابن صهيوني… "يا هوه … يا هوه…" نسينا… نسينا بن جوريون… وجولدا… وجولدمان… نسينا مردخاي… واشكول… وشارون وديان… نسينا شامير… وبيجن… وشمعون وابا ايبان… نسينا رابين… وعزرا وغور…. وال غور ووايزمان نسينا اسماميهم… وهم مش ممكن ينسوا أسامينا… لكن الوطن في الوجدان… في وجدانا شيبنا والشبان – لازم يعرفوا… أن الوطن وطنا… وياما جيوش على هالأرض مرت…. ومرت. ومعارك نصر… معارك هزيمة… ومرت. ودول عمرت…. ومرت… ودول استعمرت… ومرت… وينهم اليوم… إمبراطوريات طواها النسيان. والوطن هو الوطن والأرض هي الأرض… وتبقى الأرض هي لنا وطن.. أرض… وسما… هي لنا أرض وسما… وإنسان… إذا ما كان فيه إنسان… لمين الوطن… ولمين العمران !! إذا ما كان فيه إنسان… ليش انموت… وليش انحارب… وعلشان مين نموت… وعلشان إيش نحارب… ليش نبني ونعمر…. ليش… وليش… وليش قضيتنا… أرض… وإنسان… الأرض بتعطى…. والانسان بيعطي . قضيتنـــا ... أرض وإنسان أرض وإنسان . ____________________ * حدود سبتمبر والعدوان. غزة 1997م |